Lajme Shqip Tuesday, 06 December 2011 10:30

Kukës – Sot në orët e para të mëngjesit në zonën verilindore janë shfaqur pas më shumë se 6 muajsh  reshjet e para të shiut të shoqëruara edhe me erëra të fuqishme. Prej orësh reshjet e shiut vazhdojnë  pa ndërprerje, duke vështirësuar edhe lëvizjen  e mjeteve në akset rrugore.  “Për mbajtjen nën kontroll të situatës  kemi rritur numrin e postoblloqeve në akset rrugore. Deri tani nuk është shfaqur asnjë  problem”, pohojnë burime zyrtare të policisë rajonale rrugore.

“Reshjet e shiut janë të dendura, të shoqëruara edhe me erëra të fuqishme e vetëtima. Pavarësisht kësaj deri  tani nuk kanë shkaktuar problem në zonat rurale, ku  shfaqja e rrëshqitjes së tokës është  e shpeshtë”, thotë përgjegjësi i zyrës së emergjencës civile në prefekturën e Kukësit,  Azem Tema.

Ndërkohë, reshjet e shiut kanë qenë të mirëpritura nga qytetarët për shkak se thatësira e këtyre muajve të fundit ka sjellë uljen drastike të prurjeve të ujit të pijshëm në burimin e Kolosjanit, gjë që ka bërë që prej kohësh katet e larta të pallateve të mos furnizohen me ujë të pijshëm.

Po ashtu, reshjet e shiut që sapo kanë nisur, do të ndalojnë rënien e mëtejshme të nivelit të ujit në liqenin e Fierzës. Ditët e fundit prurjet e ujit në liqenin e Fierzës ishin vetëm 35 metër kub në sekondë, gjë që solli rënien me ritme të shpejta të nivelit të liqenit, duke nxjerrë mbi ujë edhe rrënojat e qytetit të Kukësit të vjetër.