Lajme Shqip Saturday, 19 September 2015 10:46

Ish-anëtari i Kryesisë së LDK-së, Eqrem Kryeziu, pas një pauze, përsëri ka folur për Qeverinë, marrëveshjet me Serbinë, Isa Mustafën dhe pavarësinë.

Ai ka thënë se as që pret diçka të mirë prej Kryeministrit aktual derisa ka ironizuar me te duke thënë se “burrnimi” ka pranuar gjithçka që i është ofruar në Bruksel.

Sipas tij, aktualisht në pushtet është jnë qeveri arrogante me gjuhë primitive.

A po përdoret gjuha e ashpër e pushtetit për të shpërqëndruar fokusin nga marrëveshjet e fundit?

Kryeziu: Për fat të keq, ne prodhuam qeveri arrogante. Nuk e besoj, se është taktikë e saj kjo gjuhë primitive, por është tregues i natyrës së saj.

Me krijimin e ‘’Zajednicës’’ serbe, apo krijohet një mini-shtet brenda territorit të Kosovës?

Kryeziu: Parimisht, asnjëherë nuk më ka shkuar mendja për të qenë kundër që pakicat ta ndiejnë veten krejt komod në Republikën e Kosovës. Por, që kur isha në parlament, atje pata thënë se komoditeti i cilës do pakicë nuk mund të tolerohet kur cenon ekzistencën e shumicës. Ka pra, një kufi që nuk bën të kalohet për hirë të zhvillimeve në të ardhmen. Ky do të ishte parimi themelor. Tani kemi një dokument që burrnimi ynë ka nënshkruar në Brussels, ku nuk figuron askund togfjalëshi “Republika e Kosovës”. – Mos e përmendni Republikën e Kosovës, sepse Serbia nuk e njeh, – thotë Vučić. – Mos e përmendni Republikën e Kosovës, sepse pesë shtete të BE-së, nuk e njohin – thotë Mogherini. Por se duhej guxim i madhë prej burrnimit tonë, shkuar atje në emër të Republikës së Kosovës, që ta mohojnë me lehtësi të padurueshme atë tog fjalësh.

A po vazhdon vetëm të rrudhet e zvogëlohet territori i Kosovës, në vazhdimësi nga ky pushtet I cili kohëve të fundit nga opozita vlerësohet i papërgjegjshëm, gjithmonë në emër të paqes rajonale dhe gjithmonë duke u sakrifikuar vetëm Kosova dhe duke iu rrëmbyer asaj pjesë të territorit?

Kryeziu: Marrëveshjet e nënshkruara, po shkojnë gjithmonë vetëm në dobi të vendeve të tjera fqinje, të cilat po përfitojnë edhe territore edhe në fushën e integrimeve eurpiane? Sipas asaj që kam parë e dëgjuar, del se territori po rrudhet. Kur ka mospajtime të këtilla duhet t’i drejtohemi arbitrazhit ndërkombëtar.

Si e vlerësoni deklaratën e kryeministrit Isa Mustafa, që kërkon mirëkuptim nga Lista ”Srpska” që të bëhen ndryshimet në amendamentet Kushtetuese, por në rast se refuzohet një gjë e tillë nga ky subjekt serb, FSK-së do t’i bartën përgjegjësitë që janë paraparë t’i kenë Forcat e Armatosura të Kosovës?A do të thotë kjo se ky koalicioni qeverisës – po heq dorë nga krijimi i ushtrisë së Kosovës?A është edhe një fitore e radhës e Serbisë dhe ndikimit direkt të saj në Kosovë, përmes Listës ”Srpska” që dirigjohet nga ata?

Kryeziu: Po ta komentoja Isa Mustafën, del se ende kam uzdajë se kthehet për së mbari. E pra, një shpresë të këtillë mos e kërkoni tek unë.

Opozita ka paralajmëruar protesta të fuqishme kundër Asociacionit, demarkacionit , korrupsionit dhe kapjes së shtetit. A ka arsye të mjaftueshme për këto protesta dhe çfarë rezultati mund të sjellin protestat e tilla?

Kryeziu: Opozita, në çdo kohë ka arsye të mjaftueshme. Por tani, siç më shkruante një mik në Facebook, po deshëm të informohemi, duhet t’i përcjellim mediet e Beogradit. Qeveritarët tanë janë bërë pishq. Pishqit nuk flasin, kaq di nga zoologjia.

Edhe pozita por edhe opozita, e kanë dëshmuar që nuk janë alternativë për Kosovën dhe popullin e saj, sepse edhe njëra edhe tjera duan të jenë në pushtet, që ta vjedhin sa më shumë këtë popull dhe këtë shtet! A i duhet Kosovës një alternativë e re?

Kryeziu: Paj, alternativa e re do të ishte zgjidhje krejt demokratike e këtij turpi. Por do të duhej të kishte kërkesë, pastaj vjen oferta.

A i duhet Kosovës një Qeveri e shpëtimit kombëtar, qeveri ekspertësh, me intelektualë të mirëfilltë, të painkriminuar në krime të natyrave të ndryshme?

Kryeziu: Personalisht besoj në ndikimin që në proceset tona duhet të kenë miqtë tanë ndërkombëtarë. Nuk është realizuar projekti i Republikës së Kosovës për ca grupe të pangopura, deri në atë masë sa e detyruan një plak në Gjilan të thotë një fjali pyetëse, vetëm një fjali: “A hahet pavarësia?” O, sa trishtim! /Burimi: Shqip Press”/