Lajme Shqip Wednesday, 15 February 2012 14:11

Prishtinë – KFOR-i dërgoi sot ndihma nga ajri për pesë barinjtë e izoluar në bjeshkë afër fshatit Restelicë, në komunën e Dragashit, në jug të Kosovës, ku ka reshje të mëdha të dëborës.

Barinjtë janë duke u kujdesur për bagëtitë në një fermë. Qendra e Situatave e Ministrisë së FSK-së në bashkërendim me Qendrën e Situatave të Qeverisë, KFOR-in, banorët lokalë dhe shoqatën “Nëna Terezë” arriti me sukses të koordinojë të gjitha aktivitetet, që ky operacion humanitar dhe emergjent të përfundojë me sukses.

Sipas njoftimit të Ministrisë së FSK-së, pas operacionit të zhvilluar dje pas dite, tani këta banorë nuk janë më në rrezik, pasi ndihmat e dërguara, do t’u mundësojnë atyre një qëndrim më të gjatë në ato lokalitete duke qenë të furnizuar me artikujt ushqimorë të domosdoshëm dhe me gjëra të tjera të nevojshme.