Lajme Shqip Monday, 13 February 2012 21:00

Bruksel- Petar Stano, zëdhënës i eurokomisionerit për zgjerim Shtefan Fyle, deklaroi sot se referendumi i ardhshëm në veri të Kosovës nuk është rrugë për zgjidhjen e problemeve.

“Dhuna, barrikadat dhe referendumi nuk janë zgjidhje”, deklaroi Stano.

Zëdhënësi shtoi se sipas KE-së, “deri në zgjidhje mund të arrihet verëm përmes paqes, konsultimeve dhe dialogut”.

KE-ja është e njohur me pozicionin e Beogradit, se referendumi për mospranimin e institucioneve të Prishtinës është i panevojshëm dhe kundërproduktiv, theksoi ai.

Përfaqësuesit politikë të serbëve të komunave veriore të Kosovës tashmë po bëjnë përgatitjet e fundit për organizimin e referendumit më 14 dhe 15 shkurt për të vendosur nëse pranojnë ose jo institucionet e Kosovës.

Qeveria e Kosovës dhe mekanizmat e pranishëm ndërkombëtarë thonë se rezultati i këtij referendumi nuk do të ketë asnjë efekt.

Por, serbët e veriut nuk janë tërhequr nga organizimi i tij, madje edhe pas vërejtjeve të Beogradit zyrtar, i cili ka drojën se një referendum i tillë mund t’i kushtojë Serbisë me humbjen e statusit të kandidatit për integrim në BE. (LajmeShqip.com)