Lajme Shqip Tuesday, 31 January 2012 10:00

Prishtinë- Ndërmjetësi i Bashkimit Evropian në bisedimet teknike Kosovë-Serbi në Bruksel, Robert Cooper, do të vizitojë sot Prishtinën, ku do të takohet me udhëheqësen kosovare të dialogut, zv/kryeministren Edita Tahiri.

Lajmi bëhet i ditur nga burime zyrtare të qeverisë së Kosovës. Javën e kaluar, zv/kryeministrja Tahiri zhvilloi një bisedë telefonike me ndërmjetësin evropian, Robert Cooper në kuadër të përgatitjeve për raundin e ardhshëm të dialogut teknik.

Temat kryesore të bisedës ishin çështja e bashkëpunimit rajonal, situata në zbatimin e marrëveshjeve si dhe procesi i finalizimit të protokollit teknik të marrëveshjes së IBM-it.

Me këtë rast, zv/kryeministrja  Tahiri ritheksoi përkushtimin e Qeverisë së Kosovës për progresin e dialogut teknik, si një mundësi e mirë për t’i zgjidhur çështjet praktike mes dy shteteve, në interes të qytetarëve dhe integrimeve evropiane e euroatlantike.

Lidhur me çështjen e bashkëpunimit rajonal, Tahiri theksoi se Kosova duhet të marrë pjesë si shtet i pavarur dhe sovran, me simbolet e saj shtetërore dhe të jetë nënshkruese e marrëveshjeve rajonale.

Ajo hodhi poshtë propozimet e Serbisë për çfarëdo referencash që nuk përkojnë me realitetin, duke thënë se Rezoluta 1244 është e tejkaluar juridikisht dhe politikisht.

Cooper nga ana e tij, u informua mbi qëndrimet dhe kërkesat e palës së Kosovës dhe premtoi angazhim për të përafruar qëndrimet e palëve për çështjen e bashkëpunimin rajonal.

Ai po ashtu premtoi angazhimin e tij për të përshpejtuar procesin e zbatimit të marrëveshjeve të arritura deri më tani. (LajmeShqip.com)