Lajme Shqip Saturday, 03 September 2011 13:27

Bulqizë – Minatorët e Bulqizës kanë vijuar edhe sot protestën e tyre përpara zyrave të “ACR”.

Protesta ka më shumë se tre muaj që ka nisur dhe pritet të vazhdoj deri në realizmin e kërkesave të tyre, për rritjen e rrogës 20-40 për qind, kushte më të mira pune, uljen e moshës së pensionit, si dhe largimin nga detyra të administratorit të kompanisë “Albanian Crom”.

Ndërkaq, ditën e shtunë protesta u shoqërua dhe me mbledhjen rutinë të komisionit të protestës, i cili ritheksoi edhe një herë vendimet e marra gjatë ditëve të kaluara, për vazhdimin e protestës nga ora 07.00 deri në orën 15.00, çdo ditë deri të hënën, kur pritet të nis dhe sezoni i ri parlamentar.

Në këtë mbledhje minatorët kanë kërkuar që qeveria të rishikojë statusin e tyre dhe të vendosë në vend dinjitetin e punëtorëve të minierave, duke përfshirë këtu kërkesat e parashtruara, duke bërë të qartë se, nëse nuk do të ketë një nënshkrim të marrëveshjes, atëherë protestat do të përshkallëzohen më tej duke kërcënuar me rifillim të grevës së urisë.