Lajme Shqip Thursday, 22 November 2012 14:57

Prishtinë – Presidentja e Republikës së Kosovës, Atifete Jahjaga ka emëruar sot Blerim Shalën bashkërendues politik për dialogun Kosovë-Serbi.

“Presidentja e Republikës së Kosovës, Atifete Jahjaga, bazuar në Kushtetutën e Republikës së Kosovës, nenin 83 dhe nenin 84, pika 2 dhe pika 4, dekretoi Blerim Shalën, koordinator politik në dialogun për normalizimin e marrëdhënieve ndërmjet Republikës së Kosovës dhe Republikës së Serbisë”, thuhet në njoftimin e lëshuar nga kabineti i presidentes Jahjaga.

Në bisedimet teknike të zhvilluara deri në fillim të këtij viti, Kosovën e ka udhëhequr në bisedime, zëvendëskryeministrja, Edita Tahiri.

Kryeministri i Kosovës Hashim Thaçi dhe ai i Serbisë, Ivica Daçiq, kanë zhvilluar deri më tash dy takime në Bruksel, në atë që është vlerësuar si dialog i nivelit më të lartë.

Kabineti i presidentes së Kosovës, Atifete Jahjaga, nuk ka dhënë detaje në lidhje me rolin që do ta ketë, nënkryetari i AAK-së, Blerim Shala në këtë proces të dialogut.

Gjithashtu nuk dihet nëse do të formohen grupe punuese, apo cilët do të jenë hapat e ardhshëm të palës kosovare në përballjen me delegacionin serb.

Me këtë rast kryeministri i Kosovës, Hashim Thaçi ka mirëpritur dekretimin nga ana e presidentes së Kosovës, të Blerim Shalës në pozitën e  bashkërenduesit politik në dialogun për normalizimin e marrëdhënieve ndërshtetërore ndërmjet Republikës së Kosovës dhe Republikës së Serbisë.(LajmeShqip.com)