Lajme Shqip Thursday, 04 August 2011 19:33

Shkup – Bashkimi Demokratik për Integrim (BDI) ka arritur që ta bindë partnerin e koalicionit VMRO-DPMNE-në, se nuk duhet të ketë kishë në qendër të Shkupit. Lajmi është konfirmuar nga një zyrtar i lartë i partisë së Ahmetit.

“Për ne me rëndësi është se nuk do të ndërtohet kishë në qendër të Shkupit, projekt ne të cilin e kundërshtuam që nga fillimi. Dislokimi i kishës nuk është puna jonë“, ka thënë zyrtari integrist.

Jozyrtarisht, kisha e cila ishte planifikuar të ndërtohet në qendër të Shkupit do të dislokohet në afërsi të shtëpisë përkujtimore të Nënë Terezes. Lajmin për dislokimin e kishës nuk e komentojnë në partinë e Gruevskit.

Kisha në qendër të Shkupit ka qenë pjesë e projektit “Shkupi 2014”, e cila shkaktoi reagime të shumta nga ana e partnerit shqiptarë në qeveri BDI-së.

Ndërtimin e kishës e kundërshtuan edhe të rinjtë maqedonas të cilët përmes protestave nuk pajtoheshin me vendimin që në atë vend të ndërtohen objekte fetare.

Ndërkohë, projekti “Shkupi 2014” në sheshin e Shkupit po vazhdon të rris koston e harxhimeve shumëmilionëshe. Ditëve të fundit, Ministria e Kulturës ka arritur marrëveshje të re pa shpalljen e konkursit publik për punimin e disa skulpturave të personaliteteve artistike dhe skulptura arti. Për këtë projekt të skulpturave janë ndarë rreth 600 mijë euro. Pastaj, ndërtimi i Teatrit të Vjetër të Shkupit në pjesën e djathtë të lumit të Vardarit ka arritur një çmim mbi 20 milion euro.

Nga Ministria e Kulturës kanë bërë të ditur se këto skulptura nuk do të simbolizojnë personalitete konkrete të artit, mirëpo ato do të simbolizojnë teatrin, literaturën dhe dramën. (LajmeShqip.com)