Lajme Shqip Saturday, 02 July 2011 14:02

Tiranë – Aleanca “Kuq e Zi”, në një takim me intelektualë, të shtunën, në Hotel “Tirana International”, prezantoi nismën më të fundit “Një Komb, një Pasaportë”, që synon ndërgjegjësimin e opinionit publik për domosdoshmërinë e pajisjes me pasaportë shqiptare të çdo shtetasi me kombësi shqiptare.

Zv/kryetari i Këshillit të Lartë të Drejtësisë (KLD), Kreshnik Spahiu, i pranishëm në këtë takim, shprehu  rëndësinë e kësaj nisme për interesat kombëtare.

Duke përshendetur aksionin e Aleances “Kuq e zi”, Spahiu tha se “kjo është një çështje shumë e rëndësishme. Eshtë ABC e të drejtave të çdo qytetari”.

“Çdo qytetari me origjine shqiptare duhet t’i njihet automatikisht e drejta e pasaportes shqiptare, dhe këtë e ka detyrim shteti amë,  e ka Shqipëria, për t’i garantuar këtë të drejtë”, tha Spahiu, duke vene ne dukje se ky është nje standard qe aplikohet në të gjithe rajonin.

Spahiu kerkoi nga Aleanca “Kuq e zi” që ta orientoje fushaten e saj  drejt një rruge juridike dhe kushtetuese. “Mjafton nje konsensus në Kuvendin e Shqiprise, pra një shumicë e cilësuar që të bëhen ndryshimet ne  dispozitën e  ligjit per shtetesine shqiptare”, theksoi  Spahiu.

Kohet e fundit Aleanca Kuq e zi ka inicuar një  fushatë sensibilizuese kunder  nismes së qeverise per regjistrimin e popullsise mbi baza fetare dhe etnike.