Lajme Shqip Friday, 09 March 2012 00:00

Prishtinë – Në manifestimin e organizuar në Prishtinë, organizuar nga rrjeti i OJQ-ve dhe Aleanca e Gruas e Kosovës u kërkua liri dhe drejtësi për ish kryeministrin, Ramush Haradinaj.

“… Sot, shumë të vetëdijshme, jemi këtu për të shprehur shqetësimin tonë ndaj një procesi të padrejtë e të stërzgjatur, i cili po ndodhë në gjykatën ndërkombëtare, jemi këtu për prijësin tonë të kohës së luftës, kur bëhej padrejtësi ndaj njerëzimit dhe kërkohej liri, për frymëzuesin dhe krijuesin e shtetësisë, në kohën kur bëhej barazi demokratike me popujt tjerë, për udhëheqësin e vazhdueshëm të proceseve, me të cilat dëshmoi se është strateg dhe i drejtë”, tha Donika Kadaj Bujupi nga AAK.

Gratë ftuan drejtësinë ndërkombëtare që të veprojë, duke e përfunduar këtë proces sa më shpejtë dhe duke e konfirmuar edhe herën e dytë pafajësinë e tij”.

************************************

Të enjten, më 8 Mars, në Ditën Ndërkombëtare të Gruas, gratë e Kosovës, të organizuara nga Aleanca e Gruas e Kosovës dhe OJQ-të, do të mbajnë tubim madhështor në mbështetje të ish-kryeministrit të Kosovës, Ramush Haradinajt.

Manifestimi do të mbahet në orën 13:00, në sheshin pranë Teatrit Kombëtar të Kosovës, në Prishtinë.

Këshilli Organizues i këtij manifestimi është duke u përkujdesur për çdo detaj, kurse në organizim janë përfshirë, përveç zyrtareve dhe aktivisteve të AGK-së, edhe shumë femra të tjera nga rrjeti i OJQ-ve në vend.

Manifestimi i së enjtes do të jetë i pari i këtij lloji, qysh kur ish-Kryeministri Haradinaj u akuzua padrejtësisht nga Tribunali Ndërkombëtar i Hagës, pikërisht më 8 Mars të vitit 2005.

Rrjeti i OJQ-ve të Kosovës dhe Aleanca e Gruas e Kosovës ftojnë të gjitha femrat e vendit që, të enjten, më 8 Mars, në Ditën Ndërkombëtare të Gruas, të marrin pjesë sa më masovikisht në manifestimin në mbështetje të z. Ramush Haradinaj dhe të luftës së drejtë të Ushtrisë Çlirimtare të Kosovës.