Tiranë – Seanca për çështjen “Gërdeci” vijoi sot në Gjykatën e Tiranës me pyetjen e ish- drejtorit të kompanisë “Meico”, në Ministrine e Mbrojtjes,  të pandehurit Ylli Pinari.

Në seancën e zhvilluar paraditen e sotme, i pandehuri Pinari u pyet nga prokurorët e çështjes lidhur me kontratat për demontimin e municioneve luftarake në  Gërdec me kompanine “SAC” apo  njohjet e tij me përfaqësuesin e kësaj kompanie, shtetasin amerikan Patric Henry.

Ish- zyrtari i Meico-s, Pinari deklaroi se  e kishte njohur Patric Henry,  në vitin 2006,  kur, ai kishte shfaqur interers për demontimin e municioneve luftarake në vendin tonë. “Për propozimet e bërë nga kompania “SAC”, kemi vënë në dijeni ministrinë e Mbrojtjes, theksoi  Pinari.

I pyetur për  lidhjet e tij me biznesmenin Mihal Delijorgji, Pinari pohoi se,  Delijorgjin e kishte njohur, para vitit 2000,  kohe kur, ishte i angazhuar në sektorin privat.

Në seancë, Ylli Pinari refuzoi t’i përgjigjej pyetjeve të prokurorisë lidhur me materialet shkresore të sekuestruara në kumpjuterin e zyrës së tij të punës në kompanine MEICO, duke deklaruar se  ato ishin administruar në mënyrë të kundraligjshme nga organi i akuzes.

Si të pandehur në çështjen “Gërdeci”,  janë 29 persona, në pjesën më të madhe ish- funksionarë të lartë të ministrisë së Mbrojtjes dhe Ushtrisë. Ata akuzohen si përgjegjës për ngjarjen e ndodhur në 15 mars të vitit 2008 ne fshatin Gërdec të Tiranes, kur si pasojë e një shpërthimi në ish- fabrikën e demontimit të municioneve luftarake humbën jeten 26 persona ndërsa u plagosën dhjetra të tjerë.

Procesi “Gerdeci”, i nisur prej mëse një viti në Gjykaten e Tiranes,  aktualisht është fokusuar te marrja në pyetje e të pandehurve të tij.