Lajme Shqip Monday, 20 February 2012 15:00

Washington – Agjencia amerikane e Hapësirës po feston një përvjetor të rëndësishëm këtë muaj, ndërkohë që përgatitet për një të ardhme plot sfida në një periudhë shkurtimesh buxhetore. Korrespondentja Suzane Presto i hedh një vështrim të kaluarës të NASA-s, planeve për të ardhmen dhe përshtypjeve të një prej astronautëve të saj:

Një amerikan ishte astronauti i parë që fluturoi në orbitë rreth Tokës 50 vjet më parë. Kur Xhohn Glen u kthye në Tokë, publiku e priti me adhurim, ndërkohë që programi amerikan i hapësirës përgatitej për të dërguar njerëz në Hënë në 1969.

Dekada më pas, astronautja Cady Coleman bën pjesë në programin aktual të hapësirës NASA. Ajo ka qenë në hapësirë tre herë, përfshirë një qëndrim prej afro gjashtë muajsh në Stacionin Ndërkombëtar Orbital vjet.

Presidenti Barak Obama thotë se e ardhmja përfshin plane për të dërguar njerëz në Mars. Administratori i NASA-s Charles Bolden parashtroi kohët e fundit projekt-buxhetin për vitin e ardhshëm.

Sonda, objekte orbitale dhe pajisje të tjera po u ofrojnë aktualisht shkencëtarëve hollësi mbi Marsin. Laboratori Shkencor i Marsit pritet të zbresë në këtë planet në gusht. Mjeti hapësinor MAVEN do të dërgohet në Mars në fillim të vitit të ardhshëm për të studiuar atmosferën e këtij planeti.

Por ka edhe plane për shkurtime. Bolden ka njoftuar se NASA do të braktisë idenë e misioneve ExoMars, një projekt i përbashkët hapësinor mes NASA-s dhe Agjencisë Evropiane të Hapësirës. Astronautja Cady Coleman thotë se ka besim se një ditë njeriu do të shkelë mbi Mars:

“Nuk do të realizohet aq shpejt sa ç’mund ta dojë ndonjëri prej nesh, por ne si amerikanë, apo edhe njerëzit në vende të tjera në botë, nuk jemi të duruar. Njeriu është i prirur të eksplorojë. Marsi është horizonti i ardhshëm dhe do të shkojmë në atë planet kur të jemi gati. Unë jam ndër ata që e mbështesin fort këtë ide. Dua të shoh njerëz që shkojnë dhe kthehen nga Marsi, por kemi shumë punë para se të jemi gati për atë udhëtim”.

Astronautja Coleman thotë se do të kthehej me gjithë qejf në hapësirë – një ndjenjë që e bashkon me një prej shtatë astronautëve të parë të NASA-s.

36 vjet pas udhëtimit të tij në orbitë, Xhon Glen theu një rekord të ri duke udhëtuar përsëri në hapësirë në vitin 1998 duke u bërë në moshën 77 vjeçare, personi më i moshuar, që udhëtonte në hapësirë.