Lajme Shqip Monday, 04 July 2011 14:42

Shkup – Ambasadori amerikan në Shkup, Filip Riker, pasditen e sotme do të pranohet nga presidenti i shtetit Gjorge Ivanov, në takim lamtumirës, në vilën “Vodno”.

Riker, kah mesi i muajit korrik, largohet për në Uashington, ku do ta marrë postin e zv/ndihmësit të Sekretares së Shtetit, Hilari Klinton.

Edhe në funksionin e ri në Uashington, ai përsëri do të jetë përgjegjësi direkt për Maqedoninë, pasi që bëhet fjalë për byronë për çështje evropiane dhe euro-aziatike, me fokus Ballkanin.

Në vendin e tij vjen ambasadori me përvojë, Paul Volers. Nga Ambasada Amerikane në Shkup kanë konfirmuar se Volers veç është nominuar nga Presidenti Barak Obama.

Ambasadori i ri amerikan, është një diplomat me përvojë, i cili është i njohur për opinionin në Maqedoni si zëvendës i ish-ambasadores Xhillijan Millovanoviç, që, pas ikjes së saj, për disa muaj e ka kryer funksionin e ushtruesit të detyrës për ambasador.

Nga ambasada amerikane nuk dinë saktësisht se kur do të arrijë Volers, pasi që duhet të kalojnë procedurat e zakonshme në Senatin dhe Kongresin amerikan, e të cilat ende nuk kanë filluar.

Paul Volers momentalisht është duke punuar si sekretar ekzekutiv në Departamentin Amerikan të Shtetit dhe pikërisht Sekretarja e Shtetit, Hillari Klinton, ka qenë njëra nga iniciatorët kryesore që ai të emërohet ambasador në Maqedoni.

Volers rolin më të madh në Maqedoni e ka pasur gjatë kohës së zgjedhjeve të parakohshme të vitit 2008, kur nga liderët politikë ka kërkuar që zgjedhjet të mbahen në atmosferë demokratike dhe të drejtë. (LajmeShqip.com)