Lajme Shqip Monday, 26 November 2012 15:32

PRISHTINË– Presidenti i Serbisë, Tomislav Nikoliç, ka paralajmëruar kushte të reja për rrugën e vendit të tij drejt Bashkimit Evropian. 

“Kur bëhet fjalë për negociatat me Prishtinën, përfitimi ynë do të ishte që Kosova të mbetet tërësisht në përbërje të Serbisë dhe unë të jem president në Prishtinë. Kosova nuk mund t’i merret kurrë Serbisë”, ka thënë Nikoliç, për mediat serbe transmeton REL. 

Sipas tij, Serbia është shtet i rregulluar dhe e gatshme të bëhet pjesë e BE-së. Bashkimi Evropian nuk i ka dhënë Serbisë datën e negociatave për anëtarësim, duke i vënë si kusht kryesor normalizimin e marrëdhënieve me Kosovën. 

Kryeministrat e Kosovës dhe të Serbisë, Hashim Thaçi dhe Ivica Daçiç, kanë mbajtur dy raunde bisedimesh në Bruksel, nën praninë e shefes për politikë të jashtme të BE-së, Catherine Ashton, të cilat kanë për qëllim normalizimin e marrëdhënieve midis dy vendeve.(LajmeShqip.com)