Lajme Shqip Tuesday, 23 August 2011 12:59

Shkup – Javorja konservative amerikane “The Weekly Standard”, në një shkrim të saj mbi radikalizmin islamik në Maqedoni, ka shkruar se ky vend i varfër po rrezikohet nga përhapja e lëvizjes radikale islamike.

 

Shkrimi i gazetarit Stephen Schwartz ka vënë në shënjestër edhe organizimin e një tribune, më 3 gusht, në Tetovë, nga Forumi Rinor Islam, me Hani Ramadan, një ligjërues fetar i konsideruar me qëndrime radikale, që vite më parë kanë tronditur edhe Evropën. Sipas javores, FRI ai përmendet lidhur me organizimin e tribunës më 3 gusht, ndërsa gazetari Shwartz e vlerëson si të errët këtë organizatë, të themeluar në vitin 2000 dhe të regjistruar nga qeveria.

Shkrimi nënvizon se në këtë konferencë të titulluar “Islami në Evropë (rrezik apo shpëtim)”, ka ligjëruar Hani Ramadan, vëlla i intelektualit të njohur Ramadan Tariq. Hani dhe Tarik Ramadan janë nipat e Hassan el – Bena, themelues i Vëllazërisë Myslimane.

“Hani Ramadan, në vitin 2002 ka tronditur opinionin evropian të të gjitha besimeve, kur në të përditshmen “Le Monde” botoi artikullin se të gjithë që shkaktojnë tradhti bashkëshortore duhet të sulmohen me gurë. Hani Ramadan është larguar nga puna si instruktor në shkollën e mesme në Zvicër, për shkelje të të drejtave të njeriut dhe dhunë. Ai u hoq edhe nga detyra e imamit të Qendrës Islamike, nga xhamia kryesore e Gjenevës”, shkruan “The Weekly Standard”.

Sipas javores, Hani Ramadan, nga të ftuarit në Maqedoni ishte propaganduar në media se gjoja ende është Drejtor i Qendrës Islame në Gjenevë. Para tij, në muajin qershor, në Maqedoni ka qëndruar Tarik Ramadan, i cili ka vijuar një turne edhe në Kosovë, Shqipëri, Mal të Zi dhe Kroaci.

“Fundamentalistët islamikë, të inspiruar nga pikëpamjet arabe të islamit, po tentojnë që shqiptarëve t`ua fshijnë nga memoria kolektive traditën fetare myslimane. Po krijohet një hapësirë për hyrjen e parave arabe dhe ideologjisë për të marrë në kontroll Bashkësinë Fetare Islame”, shkruan javorja “The Weekly Standard”.

Në shkrimin reportazh jepen detaje se Maqedonia, si një vend i varfër, i lënë padore, me 2 milion popullsi, përbëhet nga 40 për qind të qytetarëve me përkatësi fetare myslimane, ku dominojnë shqiptarët.

“Ky vend është përcaktuar si Ish-Republika Jugosllave e Maqedonisë (Maqedoni) për shkak të pretendimeve greke për emrin Maqedoni, dhe në vitin 2001 ajo ishte skena e një lufte të shkurtër sllavo-shqiptare”, bën të ditur javorja konservative amerikane. (LajmeShqip.com)