Lajme Shqip Thursday, 03 November 2011 10:28

Është objekti më i madh i regjistruar ndonjëherë që do të kalojë pranë planetit tonë
Astronomët thonë se një asteroid me një peshë prej 55 milion ton do të fluturojë afër Tokës më 8 nëntor, nga një distancë më të afërt se sa Hëna. Ky asteroid i quajtur 2055 YU55, është objekti më i madh i regjistruar ndonjëherë që do të kalojë pranë planetit tonë. Kjo është edhe hera e parë që ne vihemi në dijeni paraprakisht për mundësinë e kalimit të një asteroid kaq afër.

Asteroidi 2005 YU55, me një diametër sa një e katërta e një milje, do të arrij në një distancë prej 201.700 milje larg Tokës në fillim të javës që vjen, në brendësi të orbitës së Hënës. Sipas “Sky and Telescope” afrimi maksimal i tij do të jetë deri 198 mijë milje larg sipërfaqes së Tokës, dhe pritet që të ndodh në ora 6:28 të pasdites, të martën e javës së ardhshme.
Nuk ka asnjë rrezik që asteroidi të godasë Tokën, por “Sky and Telescope” thonë se nëse kjo gjë do të ndodhë, atëherë do të shkaktojë një energji kinetike ekuivalente me mijëra megaton TNT.

Asteroidi 2005 YU55 u zbulua më 2005 nga Robert McMillan, në “Steward Observatory’s Spacewatch Telescope” të Arizonas. Ky asteroid që ka të ngjarë të jetë i pasur me karbon, sipas burimeve të astronomisë, ai rrotullohet çdo 18 deri 20 orë.

Dhe 2005 YU55 ka kaluar edhe më parë pranë planetit tonë Tokë. Hera e fundit ka qenë në prill të 2010-ës, ndërsa në vitin 1976 kaloi pranë Tokës edhe më afër nga çfarë pritet javën që vjen, vetëm se në ato vite askush nuk e vëzhgoi duke kaluar.

Sipas shkencëtarëve amerikanë, rasti tjetër vijues që do të kaloj kaq pranë planetit tonë do të jetë në vitin 2028, prandaj vëzhguesit hapësinor janë duke u përgatitur për të vëzhguar një fenomen të rrallë, mbase asteroidin e vetëm me përmasa aq të mëdha dhe aq afër me rrezen e bazës së teleskopëve në Tokë. Ky asteroid nuk do të përbëj rrezik për planetin tonë edhe për një shekull. Por, deri në udhëtimin e tij të ardhshëm pranë Tokës, shkencëtarët po mendojnë për të përdorur armët nukleare për shkatërrimin e tij, si opsioni i vetëm më i mirë.
Astronomët janë duke përgatitur dy radio-teleskopët, në Kaliforni dhe Puerto Rico, për të regjistruar fluturimin e 2005 YU55 kaq pranë Tokës. (LajmeShqip.com)